HORERIA MECIRIA

Ndĩna ũritũ mũnene wa ngoro na meciria,
Ta mũrigo wa ngũ nguuĩte na mũgongo
Mũrigo uratũma nyinainie kĩongo
Meciria maratherera ta maĩ ndururumoinĩ
Ya chania na mũgambo ta wa marurumĩ
Ndageria kũhinga maitho ngome,
Nĩtagũcenjia njĩra ya rũĩ

Nĩkĩĩ mwanake ũyũ
Nĩkĩĩ ũrahe meciria ta ma wadahuhu
Ũratuma ngĩe ihoru ta wa digwa
Ũkahe mĩhang’o ta ya waruku

Kaĩ ũtoĩ noowe kĩambĩrĩria na kĩrĩkĩro gĩakwa
Ũndwaraga cagũmbĩrĩ ngahana nderi rĩerainĩ
Mĩhũmũ yaaku ĩhana mwaki hĩndĩ ya heho
Nĩyo ĩnjigaga muoyo na ĩkahe ũkengu
Ta kĩũngũyũ kĩrutĩtwo maĩinĩ,
Nĩguo ngoro yakwa ĩngĩgeria kũhihia

Horeria ngoro, horera
Reke ciande ciakwa ihurũkie mutwe waku
Reke ciara ciakwa igũthathaye ta ka rũkenge
Ngũinĩre na mũgambo wa thonjo
Cionete mweere mware handũ nja
Horera, horeria meciria.
Nĩgũo ngoro yakwa nayo
Ĩgĩe na thayo ta wa toro
Horeria meciria.

—————————————
All right reserved ©

Gũtirĩ kĩndũ kĩega na kĩ mwago mũtũrũreinĩ ta mũndũ gũcemania na rũbaru rwake, no kaĩ andũ matarĩ maramenyana wega, makoragwo mahana mathanwa meri kiondoinĩ kana ta rũhiu rũtuhu(ĩĩ nĩ maũndũ maya ma wendo). Nganja na mecũranio maingĩ nĩmagiyaga mũndũ mũno agĩkamenya atĩ namanama ũyũ nĩwe.
(Translation)
There is nothing as good or as sweet in life as someone meeting their better half(their rib) as the life journey starts, the two are like axes in a bag or a blunt knife(blunt in the things of love). Doubts and uncertainty hovers around them every now and then before realizing that, “this is truly the one”
——————————————

Share this via:

About Kenyan Poet

Showcasing the best in Kenyan Arts;Music,writing,Poetry,fine art and art reviews as well as info on emerging art trends. “Art is not about thinking something up. It is the opposite…getting something down.”